കോഴിക്കോട്: വലിയങ്ങാടിയിൽ കോൺക്രീറ്റ് കെട്ടിടത്തിന്റെ സൺഷെയ്‌ഡ്‌ തകർന്നുവീണ് നാലുപേർ മരിച്ച സംഭവത്തിന് പിന്നാലെ കൂടുതൽ നടപടികളുമായി കോഴിക്കോട് കോർപറേഷൻ. കോർപറേഷന്റെ ഉടമസ്‌ഥതയിലുള്ള മുഴുവൻ കെട്ടിടങ്ങളും പരിശോധിക്കുമെന്ന് കോർപറേഷൻ സെക്രട്ടറി പറഞ്ഞു.

കാലപ്പഴക്കമുണ്ടെന്ന് നേരത്തെ കണ്ടെത്തിയ 16 കെട്ടിടങ്ങളിൽ പരിശോധന തുടരുകയാണ്. രണ്ട് കെട്ടിടം അപകടാവസ്‌ഥയിൽ എന്ന് വ്യക്‌തമായിട്ടുണ്ട്. ഇവിടെ നിന്നും ആളുകളെ ഒഴിപ്പിക്കും. കൂടുതൽ സ്‌ഥലങ്ങളിൽ ഇന്ന് പരിശോധന നടത്തുമെന്നും സെക്രട്ടറി പറഞ്ഞു. അപകടം ചർച്ച ചെയ്യാൻ ഇന്ന് കൗൺസിൽ യോഗവും ചേരുന്നുണ്ട്.

ഇതിനിടെ, വലിയങ്ങാടി അപകടത്തിലെ അന്വേഷണ റിപ്പോർട് ഇന്ന് സമർപ്പിക്കും. കോർപറേഷൻ കൗൺസിലിനും റിപ്പോർട് ഇന്ന് സമർപ്പിക്കും. ഈമാസം 23നാണ് വലിയങ്ങാടിയിൽ കോൺക്രീറ്റ് കെട്ടിടത്തിന്റെ സൺഷെയ്‌ഡ്‌ തകർന്നുവീണുണ്ടായ അപകടത്തിൽ നാലുപേർ മരിച്ചത്. തിരുവങ്ങൂർ സ്വദേശി വിനോദ്, അത്തോളി സ്വദേശി ബഷീർ, അഷ്റഫ്, കിണാശേരി സ്വദേശി ജബ്ബാർ എന്നീ തൊഴിലാളികളാണ് അപകടത്തിൽ മരിച്ചത്.