കോഴിക്കോട്: വിദ്യാർഥികള്‍ കയറും മുൻപ് മുന്നോട്ടെടുത്ത ബസ് റോഡില്‍ കിടന്ന് തടഞ്ഞ് ഹോം ഗാർഡ്. വിദ്യാർഥികളെ കയറ്റിയ ശേഷം പോയാല്‍ മതിയെന്നാവശ്യപ്പെട്ടായിരുന്നു പ്രതിഷേധം.കുന്ദമംഗലം കാരന്തൂർ മർക്കസ് സ്റ്റോപ്പിലാണ് ബസ് തടഞ്ഞത്. ഹോം ഗാർഡിന്റെ നടപടിയെ കയ്യടിച്ചാണ് വിദ്യാർഥികള്‍ സ്വീകരിച്ചത്.

മുൻ സൈനികനായ നാഗരാജനാണ് ബസിനു മുന്നില്‍ കിടന്ന് പ്രതിഷേധിച്ചത്. നെഞ്ചിലൂടെ കയറ്റിയിട്ടു വേണം പോകാൻ എന്ന് ബസ് ഡ്രൈവറോട് ഹോം ഗാർഡ് പറയുന്നതിന്റെ ദൃശ്യങ്ങളും പുറത്തുവന്നു. പത്ത് കുഞ്ഞുങ്ങളെയെങ്കിലും ബസില്‍ കയറ്റണമെന്ന് ആവശ്യപ്പെട്ടു എന്നാല്‍ അവർ അതിന് തയ്യാറാകാതെ വാഹനം മുന്നോട്ട് എടുക്കുകയായിരുന്നു. കുട്ടികളെ ബസില്‍ കയറ്റാതിരുന്നതിനാലാണ് ഇങ്ങനെ ചെയ്തതെന്ന് നാഗരാജൻ  പറഞ്ഞു.