പയ്യന്നൂര്‍ പൊലിസ് സ്റ്റേഷന്‍ റോഡില്‍ പ്രവര്‍ത്തിക്കുന്ന ബാങ്കിന്റെ പണം ഡെപ്പോസിറ്റ് മെഷീനില്‍ നിന്നാണ് 500-ന്റെ രണ്ടുകളളനോട്ടുകള്‍ കണ്ടെത്തിയത്. ചൊവ്വാഴ്ച്ച രാവിലെയാണ് കളള നോട്ടുകള്‍ ബാങ്ക് അധികൃതര്‍ കണ്ടെത്തിയത്. 

പണം നിക്ഷേപിച്ചവര്‍ കളളനോട്ടുകള്‍ ഇടകലര്‍ത്തി ഇട്ടതായിരിക്കാമെന്നാണ് പ്രാഥമിക നിഗമനം.ബാങ്കധികൃതര്‍ പൊലിസിനെ വിവരമറിയിച്ചതിനെ തുടര്‍ന്ന് അന്വേഷണമാരംഭിച്ചിട്ടുണ്ട്. ദിവസങ്ങള്‍ക്കു മുന്‍പ് കണ്ണൂര്‍ പൊലിസ് പിടികൂടിയ കളളനോട്ടുകളിലെ സീരിയല്‍ നമ്പറില്‍പ്പെടുന്നവയാണ് കാഷ് ഡെപ്പോസിറ്റ് മെഷീനില്‍ നിന്നും കണ്ടെത്തിയവയും. ഇതോടെ കണ്ണൂര്‍ ജില്ലയില്‍ വ്യാപകമായതോതില്‍ കളള നോട്ടുകള്‍ വിതരണം ചെയ്യപ്പെട്ടിട്ടുണ്ടെന്നാണ് പൊലിസിന്റെ വിലയിരുത്തല്‍.

ദിവസങ്ങള്‍ക്കു മുന്‍പ് കണ്ണൂര്‍ തെക്കിബസാറിലെ ബാറില്‍ അഞ്ഞൂറിന്റെ കളളനോട്ടുകള്‍ ഉപയോഗിച്ച് ബില്‍ നല്‍കിയ പയ്യന്നൂര്‍ സ്വദേശി ഷിജുവിനെ കണ്ണൂര്‍ ടൗണ്‍ പൊലിസ് അറസ്റ്റു ചെയ്തിരുന്നു. ഇയാളെ ചോദ്യം ചെയ്തതിനെ തുടര്‍ന്ന് പെരിങ്ങോം പാടിയോട്ടു ചാല്‍ ഏച്ചിലംപാറ സ്വദേശിനിയും കാസര്‍കോട് ജില്ലയില്‍ ഡ്രൈവിങ്ങ് സ്‌കൂള്‍ നടത്തുകയും ചെയ്യുന്ന പി. ശോഭയും അറസ്റ്റിലായിരുന്നു.

ഇവരുമായി ബന്ധപ്പെട്ടു വിതരണം ചെയ്യപ്പെട്ട കളളവോട്ടുകളാണ് കാഷ് ഡെപ്പോസിറ്റ് മെഷീനലെത്തിയതെന്നും പൊലിസ് സംശയിക്കുന്നുണ്ട്. കണ്ണൂരിലെ കളളനോട്ടുകേസില്‍ പ്രത്യേക അന്വേഷണ സംഘം പൊലിസ് രൂപീകരിച്ചു പ്രവര്‍ത്തിച്ചുവരികയാണ്. അന്തര്‍സംസ്ഥാന സംഘങ്ങള്‍ക്ക് കളളനോട്ടു വിതരണവുമായി ബന്ധമുണ്ടെന്നാണ് പൊലിസ് നടത്തിവരുന്ന അന്വേഷണത്തില്‍ തെളിഞ്ഞത്.

ഈ സാഹചര്യത്തിലാണ് പയ്യന്നൂരില്‍ നിന്നും വീണ്ടും കളളനോട്ടുകള്‍ കണ്ടെത്തിയത്. നേരത്തെ അറസ്റ്റിലായവര്‍ കളളനോട്ടുവിതരണക്കാര്‍ മാത്രമാണെന്നാണ് പൊലിസ് കരുതുന്നത്. ഉറവിടം തേടിയുളള അന്വേഷണമാണ് പ്രത്യേക അന്വേഷണസംഘം പ്രവര്‍ത്തിക്കുന്നത്.