കണ്ണൂര്‍ ജില്ലാ കലക്ടറായി അരുണ്‍ കെ വിജയന്‍ വ്യാഴാഴ്ച ചുമതലയേറ്റു. കണ്ണൂരിനെക്കുറിച്ച് നല്ലത് മാത്രമാണ് കേട്ടതെന്ന് അദ്ദേഹം പറഞ്ഞു. ഇവിടെ നേരത്തെ പ്രവര്‍ത്തിച്ച ഉദ്യോഗസ്ഥരും മറ്റും ഇവിടത്തെ ജനങ്ങളെക്കുറിച്ചും ജനപ്രതിനിധികളെക്കുറിച്ചും രാഷ്ട്രീയ നേതാക്കളെക്കുറിച്ചുമെല്ലാം നല്ല അഭിപ്രായമാണ് പങ്കുവെച്ചിട്ടുള്ളത്. എല്ലാ ജില്ലകളിലും തൊഴില്‍പരമായ വെല്ലുവിളികള്‍ ഉണ്ടാകും. അത്തരം കാര്യങ്ങളില്‍ പഠിച്ച് ആവശ്യമായ തീരുമാനമെടുക്കും. മുന്‍ഗാമികള്‍ തുടങ്ങിവെച്ച പദ്ധതികള്‍ മികച്ച രീതിയില്‍ മുന്നോട്ട് കൊണ്ടുപോകാനാണ് ഉദ്ദേശിക്കുന്നത്. സര്‍ക്കാര്‍ ഊന്നല്‍ നല്‍കുന്ന അടിസ്ഥാന സൗകര്യ വികസനം, സാമൂഹ്യക്ഷേമ പദ്ധതികള്‍ എന്നിവക്ക് പ്രത്യേക പരിഗണന നല്‍കുമെന്നും പുതിയ കലക്ടര്‍ അറിയിച്ചു.