വിദ്യാർത്ഥിയെ കുത്തിയ പ്രതികളുമായി പൊലീസ് ഇന്ന് ക്യാംപസില് തെളിവെടുപ്പ് നടത്തും..
തിരുവനന്തപുരം: യൂണിവേഴ്സിറ്റി കോളേജിൽ വിദ്യാർത്ഥിയെ കുത്തിയ കേസിലെ എസ്എഫ്ഐ പ്രവർത്തകരായ പ്രതികളുമായി പൊലീസ് ഇന്ന് ക്യാംപസില് തെളിവെടുപ്പ് നടത്തും. കസ്റ്റഡിയിലുള്ള ഒന്നാം പ്രതി ശിവരഞ്ജിത്, രണ്ടാം പ്രതി നസീം എന്നിവരുമായാണ് തെളിവെടുപ്പ് നടത്തുക. മൂന്ന് ദിവസത്തേക്കാണ് കോടതി പ്രതികളെ പൊലീസ് കസ്റ്റഡിയില് വിട്ടത്.
സംഘർഷമുണ്ടായ സ്ഥലത്ത് പ്രതികളെ എത്തിച്ച് പൊലീസ് ഇവരില് നിന്നും കാര്യങ്ങള് ചോദിച്ചറിയും. അഖിലിനെ കുത്താന് ശിവരഞ്ജിത്ത് ഉപയോഗിച്ച ആയുധവും കണ്ടെത്തേണ്ടതുണ്ട്.
കേസിൽ പ്രതികളായ പതിനാറ് പേരെ തിരിച്ചറിഞ്ഞിട്ടുണ്ടെങ്കിലും ആറ് പേർ മാത്രമാണ് ഇതുവരെ പിടിയിലായത്. പത്ത് പേർക്കായുള്ള തെരച്ചിൽ പൊലീസ് തുടരുകയാണ്.
അതേസമയം സംഘര്ഷത്തെ തുടര്ന്ന് അടച്ചിട്ട തിരുവനന്തപുരം യൂണിവേഴ്സിറ്റി കോളേജ് തിങ്കളാഴ്ച തുറക്കും. എന്നാല് കോളേജ് വീണ്ടും തുറക്കും മുന്പ് ക്യാംപസില് സമ്പൂര്ണ അഴിച്ചു പണി നടത്തുകയാണ് സര്ക്കാര്. കോളേജിലെ പുതിയ പ്രിന്സിപ്പള് ഉടനെ ചുമതലയേറ്റെടുക്കും.
