Information
ഫാറ്റി ലിവറിനെ കൈകാര്യം ചെയ്യാൻ ഡയറ്റില് ശ്രദ്ധിക്കേണ്ട കാര്യങ്ങള്...
3 Oct 20231 മിനിറ്റ് വായന
പ്രായഭേദമന്യേ ആളുകള് ഇന്നത്തെ കാലത്ത് അനുഭവിക്കുന്ന പൊതുവായ ആരോഗ്യ പ്രശ്നങ്ങളില് ചിലതാണ് ഉയര്ന്ന രക്തസമ്മര്ദ്ദം മുതല് കൊളസ്ട്രോള് വരെ.
കരളില് അമിതമായി കൊഴുപ്പ് അടിഞ്ഞുകൂടുന്ന രോഗാവസ്ഥ ആണ് ഫാറ്റി ലിവര് രോഗം. വളരെയധികം കലോറി ഉപഭോഗം, പ്രമേഹം, ഉയര്ന്ന കൊളസ്ട്രോള് തുടങ്ങിയവ മൂലമാണ് പലപ്പോഴും കരളില് കൊഴുപ്പ് അടിയുന്നത്. മദ്യപാനം മൂലമുള്ളതിനെ ആല്ക്കഹോളിക് ഫാറ്റി ലിവര് രോഗം എന്നാണ് പറയുന്നത്. നോണ് ആല്ക്കഹോളിക് ഫാറ്റി ലിവര് ഉള്ള എല്ലാവര്ക്കും ഗുരുതരമായ രോഗാവസ്ഥ ഉണ്ടാകണമെന്നില്ല. പക്ഷേ, ചിലരില് കരളില് നിറയുന്ന കൊഴുപ്പിന്റെ പ്രവര്ത്തനം മൂലം കോശങ്ങള്ക്ക് തകരാര് സംഭവിക്കുകയും നീര്ക്കെട്ട് ഉണ്ടാവുകയും ചെയ്യും. അത് പിന്നീട് ലിവര് സിറോസിസ് പോലുള്ള രോഗങ്ങളിലേക്ക് നയിക്കും.
ഫാറ്റി ലിവറിനെ കൈകാര്യം ചെയ്യാൻ ഡയറ്റില് ശ്രദ്ധിക്കേണ്ട കാര്യങ്ങള് എന്തൊക്കെയാണെന്ന് നോക്കാം...
ഒന്ന്
കൊഴുപ്പ് ധാരാളം അടങ്ങിയ ഭക്ഷണങ്ങള്, കലോറി കൂടുതലുള്ള ഭക്ഷണങ്ങള് തുടങ്ങിയവ ഡയറ്റില് നിന്നും ഒഴിവാക്കുക.
രണ്ട്
പ്രോസസിഡ് ഭക്ഷണങ്ങള്, റെഡ് മീറ്റ്, സംസ്കരിച്ച ഇറച്ചി വിഭവങ്ങള്, ജങ്ക് ഫുഡ് തുടങ്ങിയവയും പരമാവധി ഒഴിവാക്കുക.
മൂന്ന്
മധുരം ധാരാളം അടങ്ങിയ ഭക്ഷണങ്ങളും പാനീയങ്ങളും പരമാവധി ഡയറ്റില് നിന്നും ഒഴിവാക്കുക.
നാല്
പുകവലിയും മദ്യപാനവും പൂര്ണമായും ഒഴിവാക്കുക.
അഞ്ച്
ബ്രേക്ക്ഫാസ്റ്റിന് സിറയല്സ് കഴിക്കുന്ന ശീലം പലര്ക്കുമുണ്ട്. ഇതും ഒഴിവാക്കുന്നതാണ് കരളിന്റെ ആരോഗ്യത്തിന് നല്ലത്.
ആറ്
ഫൈബര് ധാരാളം അടങ്ങിയ ഭക്ഷണങ്ങള് പരമാവധി ഡയറ്റില് ഉള്പ്പെടുത്തുന്നത് കരളിന്റെ ആരോഗ്യത്തിന് നല്ലതാണ്. ഇതിനായി ചോളം, ബീന്സ്, ബ്രൊക്കോളി, ഡ്രൈ ഫ്രൂട്ട്സ്, ആപ്പിള് തുടങ്ങിയവ കഴിക്കാം.
ഏഴ്
ശരീരഭാരം കൂടാതെ നോക്കുക. അമിത വണ്ണമുള്ളവരില് ഫാറ്റി ലിവര് സാധ്യത കൂടുതലാണ്.
എട്ട്
ഉറക്കക്കുറവും കരളിന്റെ ആരോഗ്യത്തെ ബാധിക്കാം. അതിനാല് രാത്രി 7 മുതല് 8 മണിക്കൂര് വരെ മതിയായ ഉറക്കം ഉറക്കം പതിവാക്കുക.
ഒമ്പത്
വ്യായാമമില്ലായ്മയും കരളിന്റെ ആരോഗ്യത്തെ മോശമായി ബാധിക്കാം. അതിനാല് വ്യായാമം പതിവാക്കുക. ദിവസവും കുറഞ്ഞത് മുപ്പത് മിനിറ്റ് എങ്കിലും വ്യായാമം ചെയ്യാം.
