തൊഴിലുറപ്പ് പദ്ധതിയില് പഞ്ചായത്തിൽ ഒരേ സമയം 20പ്രവൃത്തികള് എന്ന നിര്ദ്ദേശം തിരുത്തി കേന്ദ്രസര്ക്കാര്
തിരുവനന്തപുരം: പഞ്ചായത്തുകളിലെ തൊഴിലുറപ്പ് പദ്ധതിയില് ഒരേ സമയം 20 പ്രവൃത്തികള് എന്ന നിയന്ത്രണത്തില് നിന്ന് പിന്മാറി കേന്ദ്രസര്ക്കാര്. കേരളത്തില് മാത്രം അൻപത് പ്രവൃത്തികള് അനുവദിക്കുമെന്ന് കേന്ദ്ര ഗ്രാമവികസന വകുപ്പ് സംസ്ഥാന സര്ക്കാരിനെ അറിയിച്ചു. കേരള സര്ക്കാര് നിരന്തരമായി ആവശ്യപ്പെട്ടതിന്റെ ഭാഗമായിട്ടാണ് കേന്ദ്രം നിയന്ത്രണത്തില് ഇളവ് നല്കുന്നത്. നിയന്ത്രണത്തിനുള്ള തീരുമാനം വന്നയുടൻ അന്നത്തെ തദ്ദേശ സ്വയം ഭരണ വകുപ്പ് മന്ത്രി എംവി ഗോവിന്ദൻ ശക്തമായ ഇടപെടല് നടത്തിയിരുന്നു.
ചുമതലയേറ്റെടുത്തത് മുതല് മന്ത്രി എം ബി രാജേഷും വിഷയത്തില് സജീവമായി ഇടപെട്ടിരുന്നു.
തൊഴിലുറപ്പ് തൊഴിലാളികളുടെ നേതൃത്വത്തില് വിഷയത്തില് ശക്തമായ പ്രക്ഷോഭങ്ങളും അരങ്ങേറി. സംസ്ഥാന സര്ക്കാര് നടത്തിയ നിരന്തര ഇടപെടലിന്റെ ഭാഗമായിട്ടാണ് കേന്ദ്രസര്ക്കാരിന് തീരുമാനത്തില് നിന്ന് പിന്നോട്ടുപോകേണ്ടിവന്നതെന്ന് മന്ത്രി എംബി രാജേഷ് പറഞ്ഞു.
മുൻ തീരുമാനം തിരുത്തിയെങ്കിലും, ഒരേ സമയം അൻപത് പ്രവര്ത്തികള് എന്ന നിബന്ധനയും ഉചിതമല്ലെന്നും തൊഴിലുറപ്പ് പദ്ധതി രാജ്യത്ത് തന്നെ മാതൃകാപരമായി നടപ്പാക്കുന്ന സംസ്ഥാനമാണ് കേരളമെന്നും മന്ത്രി വ്യക്തമാക്കി. കോവിഡാനന്തര കാലത്ത് പ്രാദേശിക സാമ്പത്തിക വികസനത്തിലുള്പ്പെടെ തൊഴിലുറപ്പ് പദ്ധതിക്ക് നിര്ണായക പങ്ക് വഹിക്കാനാകുമെന്നും വൈവിധ്യവും നൂതനുവുമായ ആശയങ്ങള് പ്രാവര്ത്തികമാക്കി സര്ക്കാര് പദ്ധതി മുന്നോട്ടു കൊണ്ടുപോവുകയാണെന്നും മന്ത്രി അറിയിച്ചു.
